رعد توما 

 جما عة المحبة والفرح .. إخوة أم الأحزان

لو بسمة نضحكها ولو دمعة نبجيها

نبديها بس منين لو ردنة نبديها

 أولها حرف الجيم وحرف الحاء تاليها

 وردتنا احلى الورد كل الحسن بيها

 مسكية من جروح ومن دموع نسكيها

 ولو ردنا تكبر بعد ونشم عطاريها

 يراد عين وكلب وجفوف تحميها

                                     .......................................

 جماعتنا حلم بعيون اخوتنا

 يحلمون يومية تكبر جماعتنا

شمال ووسط وجنوب وكل خطوة بصمتنا

وما نخلي موطئ قدم بالارض مالتنا

 إلا ونداوي الجرح بجناح إخوتنا

 حتى الحمامة تطير وتوصل رسالتنا

 إحنا المحبة جناحنا وإلاخوة فرحتنا

                              .................................................

تجتمع بأيام السنة كل الإخوات

 وتسوي برنامج وتحضر لقاءات

 ورياضة بالاعياد وبالعطلة سفرات

وما ننسى اللقاء العام ملك اللقاءات

 يجمعنا بعد غياب وطول إنتظارات

 تطلع المواهب بيه وتظهر الابداعات

  من آخر الصيحات ومن آخر الفيكات

 ويا ساتر إستر ها السنة من المفاجآت

 من مختلف الألوان من الخطابات

ها ها شيخلصة الحجي وللحجي أوقات

وكالعادة راح تكون هيجي الشعارات

  إحنا إجتمعنا اليوم وسط الإنفجارات

 ورغم المفخخات ورغم العبوات

 وشيخلصة ها الموال وهاي الإسطوانات

   خلونا نضحك بعد واقعنا مأساة

  بس منهو بينا البطل ومنو همة الأموات

  عالمنا بيه ابطال بس بالمدبلجات

 ويا خوفي كل الخوف من البطولات

   لا نصير هم أبطال ونصير مأساة

 بعدين راح نصير مثل المانيكانات

   يلبسونا كل يومين آخر الموديلات

   .................................... 

  الحمد لله صرنا نشوف كلشي عبر الأقمار

   الروتانا والسترايك وميلودي والأخبار

 وننتظر متلهفين بت عجرم وبشار

 ورمانة والبرتقالة بت عم الخيار

  ويغنون فد يومين للهوش والحمار

كل هذا مرتاحين بس إحنا بإنذار

 لا يخلص الأكاديمي وتطلع زيزي الستار

  صاير عقلنة يلكف كلشي مثل الرادار

وما كمنة نعرف ليش وبالدنيا شلي صار

ظهرنة صاير ليل والليل صار نهار

خل ننتبه ونشوف ترة الزمن غدار

طوفان نوح جاي وجايتنة الأمطار

  وتصير الجماعة تسونامي يجرفها الأعصار

    لا نبرر الأفعال ولا نكثر الأعذار 

خلو الجماعة تصيربركان من نار

 بركان حب وفرح وخدمة بإستمرار

ونصير كلنا جسر نعبر على الأسوار

إيدينا بإيد إخوتنا نصلي ودمعنا أنهار

وما نكول أبد كافي بس خلي نكمل المشوار